istorgia - Stamparia Strada

MUSEUM STAMPARIA STRADA

Strada es üna da las fracziuns dal cumün da Tschlin. Quista comunità cun seis 430 abitants es giosom l'Engiadina e fuorma il cunfin vers daman cull'Austria e vers mezdi cull'Italia. A medem temp separa quist cunfin eir las duos linguas da la regiun, nempe il ladin chi vain tschantschà in Engiadina e'l tudais-ch da l'Austria confinenta. A Tschlin, situà ot sur la vallada da l'En ed abandunà dal trafic tras l'Engiadina, ha fondà Not Cla Janett dal 1680 üna stamparia, la quala es gnüda transferida plü tard a Strada, e quai in quella chasa ingio chi's rechatta hoz il museum. Quia a Strada esa gnü stampà fin al 1880. Numerusas ouvras d'importanza per la litteratura rumantscha sun sortidas da quista stamparia.

La chasa da la stamparia deriva dal 16 avel secul. Ella fuormaiva l'abitaziun da la famiglia dals stampaduors e spordschaiva eir il lö necessari per drizzar aint üna modesta ufficina per stampar e liar cudeschs. Davo la mort da l'ultim descendent da la famiglia dals stampaduors Scharplatz (1987), ha pudü gnir acquistada quista chasa da la Fundaziun Stamparia Strada cul intent da drizzar aint ün museum.